既存在也不存在的n次元空間

2013年1月6日星期日

冬天的音樂

朋友送既生日禮物 ﹣CDs

Leessang - Unplugged
盧廣仲 - 有吉他的流行歌曲
G-Dragon - One of a Kind
Shin hyesung - Winter Poetry

先謝過朋友～多謝，謝謝，Thank you，ありがとう！

四隻碟都鍾意（所以先俾依個list朋友去買 :P）

聽歌既時候，唔一定每隻碟每隻歌，但總係有d歌會令我聯想起另外一d野，例如一種特定情況，例如某個故事橋段，又例如季節。Shin hyesung既Winter Poetry就令我感覺好冬天。平時比較少聽抒情慢歌，櫃中慢歌為主既碟僅有蘇打綠，林宥嘉，2am同依隻winter poetry。hyesung既聲線真係好適合依隻碟既歌，好soothing既感覺。個人喜好既話係track 5，哈哈，部分原因應該係節奏方面依隻碟入面算偏快XD track 4係「派台作品」，印象深刻個mv係咁轉，隻歌感覺唔止冬天，仲好聖誕。另外要提track 8 同track 1，兩隻都係純音樂。track 8作為完結，track 1作為開頭，各司其職，但係連接起黎聽都好順。（我習慣同一隻碟loop黎聽，所以最後條track完會去返track 1。)特別鍾意口琴既部分，訪問中hyesung有提及去搵Hareem擔任口琴吹奏部分，good job！

Solo活動既申彗星不同於神話放送中放下自我既鄭弼教。不作其他演戲之類既挑戰，只專注於自己能做好既音樂，好帥喔，申學長！

[推到PLURK]

2012年11月3日星期六

神放改版了～

先貼張偶吧們既相～

改版後～隱密的課外

《神話放送》第一次改版！不再以不同電視頻道為主題，而改叫做「隱密的課外」。每次會請不同領域既高手係節目中介紹同分享該領域既秘訣，然後神話成員向高手學習後要互相比拼，最後由高手選出「愛徒」。有網民認為改版前比較好笑，不過都能夠明白製作team既用心。改版前比較純娛樂性質，主要睇成員間打打鬧鬧；而改版後應該係希望增加實質既內容去吸引多d唔同階層年齡既觀眾。而我都幾認同依種改變，唔單單係吸納觀眾依個利己既方面去睇，而係同時觀眾能夠透過節目去得到一d知識，互惠互利。以fans既角度睇，成員各自solo活動既繁忙日程加上韓國天氣轉冷等既因素，改版後既室內拍攝模式亦對成員造成少d負擔，fans安心（笑）～另外放送時間亦由星期六晚改為星期日晚，希望可以對收視帶黎幫助。

第一期課外內容係風摩韓國既手機遊戲 ﹣Anipang。前幾期神放中已經見到special stupid(XD)同文大大係度玩，估唔到咁快就被拎黎做節目內容。素聞有幾名神話成員沉迷打機，所以李小D打到幾十萬分完全係意料之內。驚喜既係烔漏洞原來連打機都係漏洞，就算係第一次玩，反應都未免真係太慢啦！居然可以望住周圍都有動物可以連既畫面大叫睇唔到？！真羨慕最後獲得愛徒稱號既成員，我都想要100個心呀............

講左咁多，順便都介紹下Anipang係咩啦，其實即係我地既寶石方塊，不過寶石變成動物，將3個或以上連成一線既時候，d動物就會怪叫然後消走。比賽模式當然係限時內鬥高分啦，想知道有咩秘訣？快d去睇改版後既《神話放送》！！！

我的紀錄～順帶一提，哥們有d只有5位數分數，呵呵～

[推到PLURK]

2012年9月8日星期六

神話放送

最近好熱衷於追睇一個韓國綜藝節目：神話放送。鄭重推介俾想輕鬆笑下既朋友！

由三月開始係 jtbc台開播！不以單一題材為主，《神話放送》參考電視台「放送」模式，每一／兩集為一個單元圍繞特定主題作為節目內容，例如SF、體育、兒童、旅行頻道等。綜藝節目的另一賣點就是主持群。《神話放送》故名思義係以韓國一代偶像組合＜神話＞為主角而製作，配合佢地自2008年暫休四年後comeback之作。

一開始既時候其實無特別留意依個節目，只不過因為睇開既強心臟同兩日一夜都換季（換主持），所以搵其他綜藝睇下。加上本人於「神話」當紅既年代只係流著歐美Rock&Roll魂，完全唔知佢地六個係邊個。睇第一集SF頻道仲未知道佢地扮晒英雄周街走係完全「放下自我」出演久未露面既綜藝！睇到佢地不斷答錯問題被彈落泳池果下淨係識笑到拍晒檯！！！異色奧運會既時候又係完全不顧形象，唔理會被「終生截圖」，用超越體育精神既「鬪魂」去比賽。頭兩期都係走搞笑路線，點知到第三期人間劇場轉為紀實頻道，拍攝佢地平日工作既時候，特別果段時間準備開十四周年暨回歸演唱會。內容除左有個人自拍搞怪外，仲感覺好真摰，特別係講到成員係演唱會上受傷。正正因為依集既內容而開始留意＜神話＞依個組合。補睇返佢地今年出演既其他綜藝，知道多左佢地既經歷，更加陷入佢地既魅力當中。後來一直每星期追睇神話放送：小雞人氣王，家族娛樂館，口才之神，VS Shinee，MT之神，教室之神，神話的品格，神話誕生，最棒的朋友；每期不同既題材令觀眾快速感受到神話成員的各個面貌。最近發現自己已經深陷其中，除左會先睇jtbc app既直播再睇當晚在線無字版再睇火速更新中字版依個睇3次行為外，仲因為史劇奧運會中佢地食「春醬海螺包」而走去買吉士號角包黎食。一向唔太嗜甜既我今年食左既吉士號角包應該係前幾年既總和，真係完全中晒毒！

雖然＜神話＞係第一個不以音樂令我身陷其中既歌手，不過有搵返佢地既音樂，除左新專10輯既歌之外，舊歌都幾唔錯。最近聽左Yo! (visual rock白面烔完好突破XD）都幾鍾意，能夠係演藝圈同樂壇立足十四年不單單係因為努力出演綜藝拍劇拍電影，本身音樂同舞蹈都能夠吸引人都係其中一個因素。期待接住落黎既節目內容，亦會留意成員solo作品同下一張音樂專輯！好希望《神話放送》能夠長做長有，收視節節上升！最後既然唔怕被終生截圖，當然要post下d圖，唔好白費佢地既努力！ LOL

（李小D選手憑此表情獲得是項比賽金牌！）

[推到PLURK]

2012年7月15日星期日

Archery on Sunday

所謂儒家六藝：禮樂射御書數，當中現代最少機會接觸當然係「射」（唔計FPS Game :P)。今個月好難得，係朋友安排好報名事宜下參加左一個月射箭課程。每個星期日一大早起身去到薄扶林，七月八月全身包實企係大太陽底下幾個鐘，出既汗應該多過做高溫瑜珈！除左熱同早起身之外，依個課程都幾好玩。4堂課由咩都唔識到射中個10m靶，都幾有成功感！XD

4堂課程完結後可以入會繼續去玩甚至參加比賽等等。以後如果有機會而情況又許可下都想繼續玩，依項運動雖然好似對體能無咩要求，但實際上係考驗對不同肌肉既控制同頭腦既配合，十分適合體能肥佬既我（笑）。

有興趣既朋友可以參考以下網站。

[推到PLURK]

2012年7月7日星期六

很久以來的更新...

因為朋友推薦而申請了噗浪，而噗浪又可以連結來blogger，因而造就了這次久違了的更新。順便也更新了下面的圖﹣﹣﹣﹣﹣＞萌菌リターンズ(returns)!!!! 看了簡介，這次故事應該會到漫畫剛好漢化中止的地方﹣法國篇。要是有誰知道哪有後面的漢化漫畫，請大發慈悲告訴小的吧... 我可再受不了每三個對話框就翻一次字典的56k閱讀速度了OTL

然後..... 言歸正傳...... 嗯............. 總之就更新了～

[推到PLURK]